【港男想媾女被氹買3萬手袋，識人啫，唔好被人食返轉頭啊】
成日聽到網上情緣騙局，以為啲阿姐阿伯先會中伏？呢排有個港男自爆成為受害者之一😂
佢話年幾前同前女朋友散咗，依家仲係單身。有感自己都唔細，成30幾歲人，所以佢上網下載咗個交友app。初時佢冇諗過約炮㗎，只係想識個真心拍拖嘅女朋友，可惜佢嘅開場白唔多掂😃有啲女應咗幾句就冇下文；有啲直接唔理佢；有啲極度奇怪地主動+熱情，一睇就知想氹佢買保險、股票。
後來佢轆到一個女神，啲相望落幾可愛清純 決定埋手！對方自稱25歲OL，收入唔多，住公屋。同個女神傾咗幾日，佢覺得大家幾好傾，又feel唔到個女神好物質主義，於是主動約咗女神出嚟見面😛
佢以為女神真人同相會好大出入，好彩唔係，同相差唔多😍（心心眼）行咗陣商場，佢問女神有咩想要，可以買畀佢做見面禮，女神竟然話唔使，佢心諗今次執到寶啦：連香港僅餘1001一個唔物質女仔都被我搵到！
後來個女神提議去吃日本嘢，帶咗港男去間日本餐廳食lunch。點知個女神好似發咗癲咁，起勢咁叫嘢食，唔貴嗰樣都唔叫，一個lunch用咗港男1500蚊埋單。當時佢以為女神只係對食有要求，但好戲在後頭 😏😏
女神飲飽食醉，即刻帶佢去手袋專門店係咁睇，之後睇中一個手袋問佢靚唔靚，仲話：「你頭先係咪話會送見面禮畀我？係唔係真？定係講笑？」佢聽到女神咁講，呆咗一陣，再望一望手袋價錢牌...成3萬幾蚊！！！佢就提議上網買個畀佢，都係差唔多。女神拉佢埋一邊話：「如果你買畀我，我今晚可以陪你」港男聽到梗係色心起，扯撚晒旗，竟然真係傻到簽卡買畀女神，再上網book間靚啲嘅酒店～～
到咗夜晚，佢哋兩個拖住手去到間酒店門口，女神突然拎起手機，話屋企人出咗事，要趕返去。港男即刻拉住女神，含住淚咁講：「我book咗房喇，成3000蚊晚！」但女神好堅決咁話今晚唔得，第二日再陪佢。
最後港男嗰晚一個人喺酒店房，對住咁靚嘅維多利亞海景一個人食自己。仲有冇之後？第二日佢點wtsapp女神，人哋都冇so佢啦，交友app都block埋。
其實交友app搵對象係冇問題㗎，只係當中會有唔少別有用心嘅人。好多單身而又好渴求拍拖嘅人，成日犯咗以下幾個錯誤，將爛草當寶。
1. 如果已經曖昧緊或者想還人情畀人，就話有理由要送禮物示好啫。頭幾次見面都未認清人哋個樣，咁就唔好無啦啦送見面禮啦，盲嘅都知你勁冧佢啦...好彩遇到好人就冇事，如果唔好彩遇到仆街玩家，你等於自降身價，主導權去咗佢度，佢只會一直食住你～～～
2. 就算真係勁想送禮物...識咗起碼一個月先送都未遲啦。送咩禮物都好重要，千祈咪送名牌 鑽石，寧願你自己煮嘢食畀佢食，或者見到佢冇咩送咩（一啲唔貴嘅嘢，如襪）假如佢真心對你有興趣，一定覺得好窩心。如果佢想玩你？好快會玩到悶，現形㗎喇。
.
3. 人人都有性慾，唔好咁快起色心。人一想搞嘢個腦就會hang咗機，諗唔到嘢，呢個時候對方講乜你都好易落疊😃好似港男事主咁就交咗$34500學費喇
大家如果想知多啲媾人技巧就留言話我知！
#By懶醒女朋友
Search